Sostituzzjoni ta’ sustanzi kimiċi perikolużi
Sostituzzjoni ta’ sustanzi kimiċi perikolużi
Il-kumpaniji fl-UE qed jissostitwixxu dejjem aktar is-sustanzi kimiċi perikolużi u l-proċessi ta’ manifattura ma’ sustanzi kimiċi aktar sikuri u ma’ teknoloġiji aktar ekoloġiċi. Dan jista’ jġib benefiċċji sostanzjali għall-kumpaniji, l-ambjent u s-saħħa tal-ħaddiema u l-konsumaturi. Jista’ wkoll ikollu impatt pożittiv sinifikanti fuq l-implimentazzjoni ta’ ekonomija ċirkolari.
Benefiċċji
Hemm ħafna raġunijiet għaliex il-kumpaniji jew organizzazzjonijiet oħra jistgħu jfittxu li jissostitwixxu sustanza kimika, bħat-titjib tal-impronta ambjentali tal-prodotti jew tal-proċessi tal-manifattura tagħhom, l-għoti ta’ funzjonalità teknika aħjar jew ir-rispons għad-domandi tal-klijenti jew ir-rekwiżiti legali. Bħala parti minn dawn l-isforzi ta’ żvilupp, huwa importanti li wieħed ifittex li jnaqqas ir-riskji potenzjali kkawżati mis-sustanzi li jintużaw. Għandhom jiġu kkunsidrati diversi għażliet ta’ sostituzzjoni: il-bidla għal sustanza kimika inqas perikoluża, l-użu ta’ teknika alternattiva jew il-ħolqien ta’ disinn ta’ prodott differenti. Fil-prattika, normalment hija kombinazzjoni ta’ dawn l-azzjonijiet li twassal għas-suċċess. Ħafna drabi, dawn l-azzjonijiet itejbu l-effiċjenza tal-produzzjoni, jixprunaw l-innovazzjoni, jgħinu lill-kumpaniji jiksbu vantaġġ kompetittiv u jiffrankaw l-ispejjeż, u fl-aħħar mill-aħħar ikunu ta’ benefiċċju għas-saħħa tal-bniedem u għall-ambjent.
Rekwiżiti legali
Meta tiġbor data dwar l-impatt ta’ sustanza kimika fuq is-saħħa tal-bniedem u l-ambjent, tista’ tikkonkludi li tista’ tnaqqas ir-riskju kkawżat mis-sustanza tiegħek.
Filwaqt li dak l-għarfien fih innifsu jista’ jwasslek biex tfittex alternattivi aktar sikuri, għas-sustanzi l-aktar perikolużi, il-leġiżlazzjoni tal-UE tista’ teħtieġ li inti tissostitwihom.