Sustanzi ta' tħassib potenzjali
Sustanzi ta' tħassib potenzjali
Filwaqt li tibni fuq l-esperjenza miksuba matul l-ewwel snin tal-implimentazzjoni ta' REACH u tar-Regolament CLP, l-ECHA żviluppat strateġija regolatorja integrata li tiġbor flimkien id-diversi proċessi regolatorji. L-istrateġija tipprovdi bażi ċara u koerenti biex jintlaħqu l-għanijiet tar-regolamenti u tikkontribwixxi għall-għanijiet stabbiliti mill-Għanijiet ta’ Żvilupp Sostenibbli tan-Nazzjonijiet Uniti dwar is-sustanzi kimiċi.
- Li tagħżel b’mod effiċjenti sustanzi jew gruppi ta’ sustanzi li jqajmu tħassib potenzjali. L-informazzjoni meħtieġa biex tiġi vvalutata s-sikurezza tagħhom tiġi ġġenerata sabiex kwalunkwe tħassib li jifdal ikun jista’ jiġi indirizzat permezz tal-aktar miżuri regolatorji xierqa għall-ġestjoni tar-riskji.
- Li tiżgura intervent xieraq u f’waqtu mill-atturi kollha — ECHA, L-Istati Membri, il-Kummissjoni Ewropea u l-industrija
- Li tipprovdi fiduċja fost il-partijiet ikkonċernati li r-reġistranti jissodisfaw ir-rekwiżiti ta’ informazzjoni ta' REACH, filwaqt li tippromwovi komunikazzjoni mtejba dwar l-użu sikur fil-katina tal-provvista.
Implimentata mill-2016, l-istrateġija kompliet il-ħidma mibdija taħt il-Pjan Direzzjonali tal-SVHC.
Il-kooperazzjoni bejn l-awtoritajiet — l-ECHA, il-Kummissjoni Ewropea u l-Istati Membri — hija essenzjali għall-implimentazzjoni effiċjenti u effettiva tal-proċessi REACH u CLP skont l-Istrateġija Regolatorja Integrata tal-ECHA. Billi jaħdmu flimkien mal-partijiet ikkonċernati, inklużi r-rappreżentanti tal-industrija u l-NGOs, l-awtoritajiet jistgħu jgħinu biex jiżguraw it-trasparenza u l-prevedibbiltà tal-attivitajiet regolatorji, u jiżguraw li l-partijiet kollha jkunu infurmati dwar il-progress li jkun sar fl-indirizzar ta’ gruppi partikolari ta’ sustanzi.
Kif inhuma integrati l-proċessi?
L-infografika ta’ hawn taħt tipprovdi ħarsa ġenerali lejn il-proċessi differenti u kif dawn jirrelataw ma’ xulxin. Sustanza tista’ tidħol fi proċess regolatorju fi kwalunkwe ħin mingħajr ma ssegwi l-fluss muri fid-dijagramma.